Just this new year, Mr death don give di Nigerian film industry Nollywood serious blow.
Dis new year week wey pass so, na im Nollywood uprising actress Jennifer Omole die. Sources reveal say di 33-year-old entertainer die for Spain for January 3 and dem bury her di next evening for one town wey dem dey call Villarejo de Salvanes for Madrid.
Fellow Nollywood star, Uche Ogbodo, naim make di announcement for social media and most of di information na from am. For Instagram on Sunday, January 5 na im Ogbodo reveal di news of di actress death for Spain. Ogbodo post photo of burning candle to show last respect, com still write say:
For January 3, im beta sweet friend die and di thing dey pain am for body but well sha na only God sabi wetin beta pass. Ogbodo post too say make people help wish im friend RIP.
Actress Omole manager, Eddyjoe Benson too post im own final respect for facebook say:
Im no know wetin to talk or write. Im just wan say Rest In Peace (RIP) to im oga, Jennifer Omole. When im dey work with her, she make am realize say good people still dey dis world. work with Omole expose am enter anoda level for how Im go fit take sell films to Africa Magic… Benson dey wish her to rest well, Im no fit question God.
Before she die, Omole na member of di Actors Guild of Nigeria for Spain. Omole spend most of her time for Spain because na dia she been dey live before, although her friends talk say she relocate to United Kingdom of recent where she take do her film wey dem call “stolen vow”.
Omole appear for many oda films too including ‘Adamu & Eva’ wey she be di lead role and na Spain dem take shoot am too.