Hip hop star Eedris Abdulkarim lead Baba Fryo and Charly Boy with other pipo go protest against Adeboye for The Redeemed Christian Church Of God camp
Dem go do small wahala for de camp as dem call on de General Overseer of The Redeemed Christian Church Of God, Pastor Enoch Adeboye say make him no just dey look wetin dey happen for de country as dem ginger am make him talk on behalf of de pipo wey no get voice as be say no be every body wey get mouth get voice.
De group on Monday 8th July 2019 carry wetin oyibo dey call placard where dem write “Adeboye would you have kept quiet if Leah were to be your own biological daughter”?
Dem dey criticize am based on say him never talk anything about 16 year old Leah Sharibu wey Boko Haram kidnap under de government of President Muhammadu Buhari and Vice President Yemi Osibanjo wey be pastor for The Redeemed Christian Church Of God when de girl dey 14 years.
Dis one dey happen after Pastor Adeboye talk about wetin de rape allegation wey Busola Dakolo raise against COZA pastor Biodun Fatoyinbo.
For de picture wey dey follow for down, you fit see musician Eedris Abdulkarim and other pipo wey dey protest as dem dey waka dey call on de man of God make him be de voice of de pipo.
No forget say na still under de government of President Muhammadu Buhari RUGA project wan start and dis RUGA project na de kain project wey go give pipo wey dey keep cow (herdsmen) and other animal wey be like cow space for different area for obodo Nigeria where dem go occupy.
After many state governors no gree with de idea of RUGA, government suspend de project.
De full meaning of RUGA na Rural Grazing Area.