LEARN TO MAKE MONEY WITH AFFILIATE MARKETING
“I don struggle all my life. See di kain place me and my husband dey live. But I no worry because I know say my children go helep us as dem don grow. Now wey time don dey reach to reduce dis our suffering dem don kill one of dem.”
Na wetin Ayanwole Comfort, di mama of Bamise wey talk as she react to her pikin death.
“I no born my pikin for anybody to use am do money ritual. Na struggle she dey struggle so dat she go fit survive as we her parents no get money.
She no dey don anything illegal bcos na work she dey learn. She just graduate from di first place she dey do fashion designing. To improve herself she decide to go anoda place to learn more. Na struggle she dey struggle and now dem don kill am. Bad pipo don break my backbone.” Mrs. Ayanwole Comfort tok as she dey cry.
Tori of di death of Bamise dey trend for Naija as pipo dey call for justice. Bamise bin miss for about a week before di tori enta public space and before dem find her dead.
Bamise mama say she dey helpless
Bamise mama wey dey call for justice remember di last time wey she see her pikin, she say she no believe say she no go ever see her pikin again.
“E neva reach three weeks wey she buy her new phone. Di phone wey she dey use before no good and she just struggle buy her new phone wey she neva even pay finish. Wetin for happun if to say she no get dis phone. We for no know wetin kill am.
I no believe say I no go see my daughter again. She chop my food di last time she visit me. I no know say na di last time I go feed my pikin be dat.
I dey helpless except God come down to help me. Make goment also come help me. Di goment of Lagos and Ekiti wey I come from. Make dem come help me because we no get anybody to help seek justice for dis mata.
Bamise papa say Goment fail im pikin
For Bamise papa, goment don fail im pikin becos di bus wey she enta na goment bus wey suppose like dat no suppose happun.
“We wey be poor pipo for society dey only rely on wetin goment give us. Na so we dey take survive for many years. Goment bring bus say make we enta. We enta finish come still dey die.
If goment bus no dey safe again wetin we go come begin do. See as dem kill my pikin. Goment don first fail her bcos dem no fit provide her di education wey she want. Now dem no fit assure her safety. She die inside goment property. ” Bamise papa tok.
Di papa say dem want justice.
“My own be say make President and governor of Lagos state join body to make sure say dem arrest all di pipo wey get hand for my daughter death. If dem no do anytin na God go judge dem.
Pipo don begin fear to enta BRT bus bcos of dis tin wey happun. Na di way dem handle am go determine how Naija pipo go see dem”. Bamise papa tok.
Meanwhile, Bamise sister follow tok say Bamise na good girl wey no deserve to die.
“Goment don fail us,” na so di elder sister Omilana Ruth tok.