LEARN TO MAKE MONEY WITH AFFILIATE MARKETING
Nollywood actor, James Ikechukwu Esomugha wey im nickname name na Jim Iyke don reveal say im dey responsible for im marriage wey fail.
Di actor for inside interview wit Chude Jidenowo explain say di time im marriage scata na wen im dey grieve di death of im mama.
Although e no tok di name of di wife, Jim say di pain of im mama death affect am well-well and di loss come lead to separation of im and im woman.
Jim Iyke tok say “I no go make anoda pesin accountable for my mistake. Wen I lost my mama, I no fit find my feet for years… I no fit grieve because I dey nurse oda pipo. I take charge of di family. Wen I begin get ova am, na dat time di loss hit me, by den, my woman dey pregnant wit my first child.
“Di grieve hit me, I no come be di loving man she meet. I even lost my sense of humour, come still follow I lose myself. I give myself to di element and she suffer for dat. I become obsessive dad as I give all my love and attention to my pikin and I leave her behind.
“I be an excellent papa but a woeful husband.”
E say afta a while, she say she no fit find who she marry and dem part as friends.
On how e take heal from di loss of im mama death, di actor say im travel go certain parts of di world to relieve imself of di pains wey im don dey keep and na so di healing process start.
Di actor say im come back two years before Covid and don dey gallant now.
Di ogbonge actor wey also be businessman also tok about im failures. E say im don fail well-well, especially for business.
E say im sabi start business but to manage am na problem.
Apart from acting, Oga Iyke say e dey into travels, logistics and oda big business.