Former communications minister for di Afghan government, Sayed Sadaat, don turn delivery man for di eastern city of Leipzig, Germany, after he run go deir for better life.
Last December when Sayed been move go Germany for better life go get delivery man work, some people for him kontri been don shame am well well say after he don dey for government, na dat kind work he go dey do.
Di 49-year-old British Afghan dual citizen sef no send dem, come talk say he no get anything to feel guilty about.
Sayed been don comot for Afghan government because of one or two wey he get with people for inside di president circle according to Reuters.
Dis na wetin he talk:
“I hope other politicians also follow the same path, working with the public rather than just hiding,”
Even tho people been don laugh am say na delivery man work he go dey do, di people wey dey Afghanistan now dey find how dey wan take jakpa after Taliban seize di kontri.
Sadaat family and friends dey find how dem wan take board evacuation flights or comot for Afghanistan. Sadaat been choose Germany unto say dem go get better work wey match him degree for IT and telecommunications but as he no fit speak di German language, e no easy for am.
Every day, he dey take 4 hours learn German for language school before he start him six-hour evening shift wey he dey deliver food give Lieferando, wey been give am work dis summer.