People wey sabi nutritional value of food dem don talk say e no get anywhere wey dey talk say to chop dog meat fit cure malaria. Them don tok say Nigerians wey get high temperature suppose go hospital make dem go tell them whether na malaria or no be malaria dey do dem.
As per wetin dem talk, de only way you fit take kill malaria na to use wetin dem dey call ‘ Ofantimalarials’. They tok say before you take malaria medicine you gats make sure say na malaria dey hook you.
Over 9,000 people for everywhere don sign wetin dem call ‘petition to stop Nigerians from eating dogs’. Natasha Choolun, UK based international animal rights activist been don start this petition one year ago and di only time wey anybody send the petition na when Naija people follow chuk mouth put give them.
Freaky freaky daddy don tok wetin do am for Lekki tollgate casala: See full gist for here
All this orishirishi dey occur for change.org and the big talk be “Stop Nigeria’s Barbaric Dog Meat Industry”. The oga for dis waka, Ms Choolun talk say dog meat business don full ground for Naija so tey other countries like Niger dey follow bring dogs make e fit dey enough for Naija but e still get some kind Naija people wey no gree make dem stop dog meat for Naija.
One ogbonge expert and researcher, Prof Olugbenga Mokuolu tok say nothing concern dog meat concern malaria. The man na National Technical Director for di Malaria Elimination programme. E tok say to dey sleep under mosquito net follow clean around di house dey help avoid malaria too.
For dis 21st century wey we dey so, people wey dey chop dog dey for Switzerland, China, South Korea, Vietnam and Nigeria. Some people wey dey chop dog meat dey chop because say, na so dem come see am, some people own na because of some kind juju things like that and some people no dey even carry am near mouth.