High court for the Federal Capital Territory don sentence one Innocent Destiny to wash Mpape Park toilet for Abuja for 60 days. This na because Innocent Destiny been dey try thief from people for one messaging platform wey dem dey call WeChat.
On top the platform, he been dey do like say he be woman and na Kim Webber be him name for there. He been dey try trick male users make he fit collect something for their hand.
Counsel to the Economic and Financial Crimes Commission, Ijeabalum Diribe been dey talk say Innocent don violate section 322 of the penal code. He follow talk say make the court convict and sentence Destiny according to the terms of the plea bargain wey Dem enter for June 22nd, 2021 wey talk say if dem find Innocent guilty, he go stay 1 month for prison or pay fine of N100,000.
Innocent lawyer, Holy Nuhu been dey beg the court make dem no use strong hand hold am as per na him first time be this and na small pikin he be.
The presiding Justice, Kezziah Ogbonnaya been talk say he go wash toilet for 60 days make e no go follow pack for prison. Na Monday, July 19th 2021 this one happen.