Fraser Goodrich na the name of the boy wey survive plane attack for 9 years. BA flight 2069 been dey go Kenya for December 30th, 2000 with him papa and brother. The British airways plane been dey fly from London Gatwick go Nairobi, Kenya.
Goodrich papa been dey work for subsidiary of the airline. Goodrich talk say for middle of the flight, around 5 for morning, one man pass am dey go front and as na only him dey wake e come wonder who day person be.
The man waka go front, enter cockpit go hold co pilot, Phil Watson. From there, plane come dey drive anyhow. The plane Captain, Hagan wey been dey relax for bunk come assist make them fight the man. The plane like this don turn upside down and everybody don scatter. Co pilot come do wetin dem dey call “Miracle manoeuver” make the plane stabilize. This manoeuver na wetin dem learn from aviation school.
Goodrich talk say after this thing happen him life don change and as he been go meet the plane Captain 17 years later to tell am thank you follow ask am wetin give am energy to drag the hijacker comot, the pilot tell am say the first thing wey enter him head na him wife and children wey follow dey the plane.
E don reach 20 years wey this thing happen and the man wey cause this wahala don dey walk free. They no carry am go court or anything. Goodrich talk say over 400 people dey that plane and if to say them crash, e for be the Biggest British Aviation disaster for history.
Goodrich follow tok say he wan tok to the man wey cause the wahala. No be say he wan fight am or anything, he just wan get conversation with am.
This one no be small matter oh. Make we discuss am for comments section.