XXXTentacion Mother Share Photo From Him Burial Venue


 XXXTentacion Mother Share Photo From Him Burial Venue

Since gunmen kill hip hop rapper XXXTentacion, the late rapper don dey get tributes from fans and fellow stars

June 27th na the rapper memorial service and fans full the Florida BB&T Center to pay their final respects to the 20-year old.


Police Don Arrest 22-year-old For The Murder of XXXTentacion

Now as the matter dey be, X mama wen her name na Cleopatra Bernard share photo wey show where them bury the young blood. The photo show one small building wey oyibo dey call “mausoleum” and them write XXXTENTACION name in capital letters along with him birth name Jahseh D. Onfroy under am.

Red, black and silver/white flowers cover the gravesite.

Cleopatra write “My guardian angel,” as caption. See photo below.

The suspect wey police don arrest for the murder of the rapper na Dedrick D. Williams and na on June 20th them arrest am. Police still dey search for two other suspects as the one wen them don arrest no get any bail conditions.

Since him die XXXTentacion music don get over 1600 percent increase in sales with “SAD!” climbing from No. 52 to No. 1 on the Billboard Hot 100, and e make am the first posthumous No. 1 song for solo artist since The Notorious B.I.G. “Mo Money Mo Problems” in 1997.

Him ? album return to the top 3 on the Billboard 200 albums chart after e appear for No. 1 in March and him 17 first project from 2017 also return to the album chart top 10 at No. 7.

Many hip hop fans and artist around the world pay am tribute when him die and people like Rick Ross, Kanye west and more follow. Even recently Jay Z talk about the killing on top “Talk Up” where Drake feature am for him new “Scorpion” album.