De State of Minnesota mark October 6 as ‘Wizkid Day’ after de singer sell out Skyway Theatre for Minnesota
According to one post wey dey de Starboy Twitter page, him get dis honour after him become de first African artist to ever sell out the Skyway Theatre for Minnesota, US on Saturday, October 6, 2018.
Him also enter him instagram page share one post about de event with de write-up,
”Sold out again last night! Love u Minnesota, y’all in my heart forever.”
No forget say early dis year de same State of Minnesota honor X3M artist Praiz as the governor also declare February 6th as official ‘Praise Adejo Day.’
De Governor of Minnesota, Mark Brandt Dayton say Wizkid na ”One of the most influential artists” on de night when him perform some of him hit singles like ‘Soco’, ‘Manya’, In My Bed’ and ‘Ojuelegba’ before de crowd.
And no be lie, if you check am, Wizzy don dey make some kind achievement wey desrve make dem recognise am. Check out de pic wey dey down.