UITH: Resident Doctors Begin 5 Days Warning Strike


The Association of Resident Doctors (ARD), University of Ilorin Teaching Hospital (UITH) chapter, on Wednesday begin a five-day warning strike sake of the report say their salaries no dey complete again.


After a peaceful rally for the hospital, the ARD President, Dr Ige Kolawole, address newsmen come talk say them for no go on strike if to say them dey get their complete payment since January 2014, but say since some kind unnecessary deduction dey always dey their salary and e don dey too much, them gaz open mouth talk make e for no lost.

The News Agency of Nigeria (NAN) report say the ARD members carry boards or wetin oyibo dey call placard, come write different things on top them as them march round the hospital complex.

Some of the placards read in quote: “Stop Selected Victimisation of Resident Doctors and House Officers.”

“Underpayment of UITH Resident Doctors Is Deliberate by CMD; Mr CMD Disobedience to Government Directives is Illegal.’’

Kolawole say the deduction dey only happen for UITH, as their members for other teaching hospitals across the country still dey receive 100% of their salaries.

The ARD president say the hospital management never give them any confirm reason why the illegal deduction dey happen.

Him say the only reason wey the UITH Chief Medical Director, Dr Abdulwaheed Olatinwo give be say the hospital don employ additional 150 House Officers.

“This is demonstration of wickedness as our salaries have continued to be deducted because of additional employment of House Officers,’’   as Kolawole talk in quote.

Him also accuse the hospital management say them employ additional workers without correct approval from the appropriate quarters.

According to Kolawole, “Enough is enough in UITH, the management should stop slashing our salaries and also stop collecting pension which is being put in a special account”.

Him say the association no go waste time invite the Economic and Financial Crimes Commission (EFCC) and Independent Corrupt Practices and Other Related Offences (ICPC) to look into the matter.

The ARD president urge the Federal Government to intervene and stop the UITH management make them no dey slash their salaries anyhow.

When newsmen contact the UITH Public Relations Officer, Mrs Funmilayo Omojasola, she no confirm or deny the allegations, but she say the management go do meeting to discuss the matter wey the doctors raise.